विद्यापीठीय अभ्यासक्रमाची मूल्याधिष्ठित मांडणी गरजेची: डॉ.अजित थिटे

Dr. Ajit Thite

कोल्हापूर, दि. ३ जानेवारी: उच्चशिक्षणाच्या क्षेत्रातील विशेषतः विद्यापीठीय अभ्यासक्रमांची मूल्याधिष्ठित मांडणी करणे आवश्यक आहे. शिक्षणशास्त्रज्ञांनी त्या दृष्टीने उच्चशिक्षणाची धोऱणे विकसित करण्यास प्राधान्य देण्याची गरज आहे, असे प्रतिपादन पुण्याच्या सेंटर फॅार डेव्हलपमेंट ऑफ लीडरशिप इन एज्युकेशनचे संचालक डॉ. अजित थिटे यांनी केले.

शिवाजी विद्यापीठाचा शिक्षणशास्त्र अधिविभाग, अंतर्गत गुणवत्ता हमी कक्ष (आयक्यूएसी) आणि बहाई अकादमी, पांचगणी यांच्या संयुक्त विद्यमाने ‘इनकल्केटींग व्हॅल्यू सिस्टिम इन स्टुडंटस् पेडॉगॉजिकल प्रॅक्टीसेस इन हायर एज्युकेशन’ या विषयावर एकदिवसीय राज्यस्तरीय कार्यशाळा काल पार पडली. त्यावेळी ते बोलत होते. अध्यक्षस्थानी आयक्यूएसीचे संचालक डॉ. आर.के. कामत होते.

डॉ. थिटे म्हणाले, उच्चशिक्षणाच्या अभ्यासक्रमांमध्ये मूल्यवर्धन अत्यावश्यक आहे. येथे शिक्षण घेणाऱ्या विद्यार्थ्यांमध्ये मूल्यांबाबतची जाणीवजागृती आवश्यक आहे. कारण येथून पुढे देशाचे नागरिक म्हणून वावरताना त्या मूल्यव्यवस्थेचे रक्षण करण्याची जबाबदारी त्यांच्याच खांद्यावर असणार आहे. त्या दृष्टीने उच्चशिक्षण संस्थांनी आपले व्हीजन, मिशन आणि गोल यांमध्ये आमुलाग्र बदल करणे आणि त्यांमध्ये मूल्यांचा निर्देश करणे काळाची गरज आहे.

दुपारच्या सत्रामध्ये पाचगणीच्या बहाई अकादमीचे संचालक डॉ. लेसन आझादी यांनी मूल्यांवर आधारित अध्यापन, शास्त्रीय कार्यनिती स्पष्ट केल्या आणि त्या संदर्भात गट-कृती राबविल्या.

शिक्षणशास्त्र अधिविभाग प्रमुख डॉ. पी.एस. पाटणकर, डॉ. कामत, व डॉ. आझादी यांनी कार्यशाळेचे संयोजन केले. संचालक म्हणून डॉ. जी.एस. पाटील यांनी तर समन्वयक म्हणून  डॉ. चेतना सोनकांबळे व डॉ. व्ही.एस. खंडागळे यांनी काम पहिले. कार्यशाळेला महाविद्यालयीन तसेच विद्यापीठ अधिविभागांतील शिक्षक मोठ्या संख्येने उपस्थित होते.